Gipuzkoako Foru Aldundiko Estrategia Bulegoak 2001-2011 legealdiaren hasieran gobernu taldeak emandako agindua bete du. Gipuzkoako Lurralde Historikorako epe ertaineko (2020) eta epe luzeko (2030) ikuspegi eta estrategia berri bana jarri du mahai gainean; eta hori guztia lurraldeko eragile sozial, ekonomiko eta instituzional ugariren arteko parte hartze eta kontrastatze prozesu luze baten emaitza izan da. Bidean mobilizatutako jakintza kontuan hartzeko modukoa izan da, adituen jakintza izan baita, eta horrek aintzat hartzeko moduko proposamen eta edukiak eman ditu. Prozesuan parte hartu eta kolaboratu duten pertsona gehienen iritziz, G+20 prozesuak balioa ekarri du.

Jakina, ahulguneak ere izan dira; horietako batzuk oso handiak. Ia denak Estrategia Bulegoaren kontroletik kanpo egon dira, izan ere, maniobratzeko tarte estua uzten zuten kanpo faktoreak islatu dira. Ahulgunerik handiena hauxe izan da: gobernu taldearen gehiengoa motz ibili dela G+20 prozesuaren dinamika, lanak eta emaitzak integratzeko orduan. Ildo horretan, prozesu honek koalizioko gobernuek izaten dituzten tentsio eta disfuntzioak jasan ditu, halako gobernuetan talde minoritario baten lidergopeko ekimenak "onartu" egiten baitira, baina talde gehiengodunak ez ditu "integratzen".  

Seguruenik, legealdiko "kultura politiko berria" esan zaionari egindako ekarpenik garrantzitsuenetako bat epe luzerako hausnarketa estrategikoa eta hausnarketa horri eutsi dion erakunde eta antolaketa berrikuntza izan da -Foru Aldundiko Estrategia Bulegoa, Batzar Nagusietako Etorkizun Batzordea-. Hala ere, ekimen horiek apenas errekonozitu eta integratu diren gobernu taldearen gehiengoak egindako legealdi laburpenean.  

Ahulguneei aurre egin behar zaie, ahulguneok identifikatu eta horietatik ikasi, ahal dela, etorkizunean errepika ez daitezen. Gipuzkoa +20 prozesuak ahalegin zintzo eta serioa egin du lurraldeari balioa ekartzeko. Ehunka pertsonak parte hartu du hausnarketa, eztabaida eta proposamen taldeetan. Arduragabekeria izango litzateke ahalegin hori lidergorik gabe eta ezerezean urturik geratzea.

Beharrezkoa da, baita ere, Estrategia Bulegoa hurrengo legealdian ondo egokitzeko giltzarriak identifikatzea. Horretaz dihardu agiriaren gainerako zatiak. Ildo horretan, badago ideia bat kontakizun osoan harilkatzen dena. Gipuzkoako Foru Aldundiko Estrategia Bulegoak politikoki garrantzitsua izan behar du. Bulegoaren ekarpenek baliagarriak izan behar dute foru erakundearen -Aldundia eta Batzar Nagusiak- politika publikoak hobetu, inspiratu eta norabidetzeko. Hausnarketek eta proposamenek lurraldearen errealitatea eraldatu eta hobetzeko ahalmena izango duten ekintzetan gauzatu behar dute.

"Gipuzkoako Panoramak" Gipuzkoaren lurraldearen errealitatearen urteko argazki bat egiteko helburua du, funtsezko hainbat aldagaien bilakaera aztertzen eta egituratzen diren bost dimentsiotan oinarritzen dira: ekonomikoak, demografikoak eta gizartekoak, ingurumen eta lurralde ikaskuntza eta ezagutza eta espazio publiko-politikoa.

"Gipuzkoako Panorama" hiru diagnostikoen batuketa da: Gipuzkoako diagnostiko orokor bat, tokiko diagnostiko bat eta Gipuzkoa eta Europako eskualdeen arteko diagnostiko konparatibo bat.

"Gipuzkoako Panorama-ren" jatorria,  G +20 prozesuaren I. fasean egin zen diagnostikoan dago. Ondoren, oraingo eskemara aldatu zen, 2009 Gipuzkoako Panorama landuz.

Orain (2011ko ekainak), Gipuzkoako Diagnostiko Orokorraren aurrerapen bat eta 2010eko Eskualdeko Diagnostikoaren behin-betiko bertsioa aurkezten dira.

Urtean zehar, Diagnostiko Orokorra osatuko da eta Gipuzkoa Europan Batasunean Diagnostikoa garatuko da, "2010 Gipuzkoako Panorama" osatzen.

2010. urtean, Gipuzkoako Estrategia Bulegoak lagundu egin dio Europako Lurralde Prospekzioaren Elkargoari Prospekzioaren gaineko Glosategia zabaltzeko prozesuan, eta horretarako gaztelaniara eta euskarara itzuli du glosategi hori.

Glosategi horretako hitzen hautaketa batek osatzen du lana, eta hitzok funtsezkotzat jo dituzte lurralde prospekzioan bereziki dihardutenek eta, oro har, baita lurralde aktoreek ere. 

Lanak, oroz gain, eskakizun praktiko bati erantzuten dio eta profesionalentzat, prospektiba ariketak egiteko, lagungarriak izan daitezkeen hitzak biltzen ditu. Edozein hautaketarekin gertatzen den legez, hemen aurkeztuko duguna ere kritikagarria izan daiteke. Sar zitezkeen beste hitz batzuk ere, noski. Batzuek ez-funtsezkoak edo alferrikakoak iritziko diete zenbait terminori. Oroz gainetik, Europako talde batek eginiko hautaketa batez ari gara, eta helburua prospekzioa eta foresight anglosaxoniarra gurutzatzea zen.

Hitz bakoitzari bere ingeleseko, alemaneko, frantseseko eta italierako baliokidea erantsi zaio, definizio labur batekin eta hitzaren aplikazioa nahiz hedadura zehazten duten komentarioekin batera, bereziki lurralde prozedura baten esparruari dagokionez. Lagungarri gisa, honako hauek azaltzen dira: bibliografia aukeratu bat, aurkibide bat, eta baita «leku» batzuk ere, non lurralde prospekzioaren aktoreek sarbide libreko baliabideak aurkitu ahal izango dituzten (artikuluak, obrak, azterlanak, programa informatikoak etab.). 

Ikus "Lurralde Prospekzioaren gaineko hitz giltzarriak".

Zientzia eta Berrikuntza Ministerioak Donostia aukeratu du Zahartzeari buruzko etorkizuneko Ikerketa Zentro Nazionala bertan egoteko. Goi mailako zientzia egitura bat izango den horrek gaian punta-puntako aditu direnak erakarriko ditu eta alor horretan lanean ari diren gipuzkoar erakunde eta enpresek bat egingo dute zentroarekin.

Zahartzeari buruzko Ikerketa Zentro Nazionalak hiru alor desberdinetan jardungo du:

Lehena: zelulen zahartzeari buruzko eta zahartze hori eragiten duten arrazoi biologikoei, arrazoi genetikoei eta ingurumen arrazoiei buruzko oinarrizko ikerketa.

Bigarrena: saiakuntza klinikoei aplikatutako ezagutza sortzea, bai zahartzeari berari dagokionez bai adinari elkartutako arazo degeneratiboei dagokienez, zahartzearen arazoari aurre egiteko soluzioak diseinatuz, hala ikuspegi epidemiologikotik nola osasun publikoaren nahiz asistentzia sanitarioaren ikuspegitik.

Hirugarrena: zentroak zahartzearekin lotutako estrategia diagnostiko eta terapeutikoak garatu nahi ditu, berrikuntzan eta teknologian diharduten beste zentro batzuen eskutik.

Informazio gehiago eskuratzeko:

http://www.diariovasco.com/v/20110518/al-dia-local/donostia-albergara-centro-nacional-20110518.html

http://siis.net/documentos/hemeroteca/110518-4.pdf

Gipuzkoako Foru Aldundiak enpresei laguntzen jarraitzen du; izan ere, laguntzak eman ditu nazioartekotzerako eta produktu berriak merkaturatzeko, eta baita lurraldeko ikerketa indartzeko ere, 7,4 milioi euroko diru laguntzen bidez.

Deialdi honetan lagundutako proiektuek hainbat alor hartzen dute, hala nola: etxez etxeko zerbitzu eta arreta eredu berrien azterketa; nekazaritzako hondakinak balioztatzea; zelula amekin eta titietako minbiziarekin lotutako gaiak eta nanopartikulen ikerketa; dena den, nabarmentzeko modukoa da arlo biosanitarioan diharduten zentroetako proiektuen kopurua.

Zientzia, teknologia eta berrikuntza sareari, 81 proiektu egiteko, 5,6 milioiko diru laguntza eman zaio, Gipuzkoan teknologia zentroek, unibertsitateetako ikerketa taldeek eta enpresetako I+G unitateek eta osasun arlokoek egiten duten ikerketa indartzeko helburuz.

Internalizazioari eta enpresei laguntzeko programari dagokionez, Berrikuntzarako eta Jakintzaren Gizarterako Departamentuak 39 produktu berritzaile merkaturatzea sustatu du, 1,16 milioitik gorako laguntzekin, sektore hauetan: makina-erremintaren sektorean, kontroleko osagai eta produktuenean, altzarien sektorean, eraikuntzarako egituren sektorean eta arlo biosanitarioan.

Halaber, enpresa proiektuen ezarpen produktiboei lagundu zaie 484.400 euroko kopuruarekin, honako jarduera hauek bultzatzeko: automozioko osagaiak; esnekiak; siderurgiako ekipamendu ondasunak, eta Txina, Tunisia, Iran, AEB eta Kamerunera eramango diren osagai eolikoak.

Azkenik, 144.513 euroko laguntzaren bidez merkataritza ezarpenak bultzatuko dira. Lau proiekturi emango zaie laguntza eta tartean honako osagai hauen enpresak izango dira: paper-arte grafikoen osagaiak; etxetresna elektrikoak eta ostalaritzako osagaiak; makina-erremintako osagaiak, eta material metalikoak, zeinak txinatar, iparramerikar eta indiar merkatuan sartuko diren.

Informazio gehiago eskuratzeko:

http://www.diariovasco.com/agencias/20110527/local/diputacion-apoya-internacionalizacion-investigacion-millones_201105271257.html

http://www.noticiasdegipuzkoa.com/2011/05/27/economia/la-diputacion-apoya-la-internacionalizacion-y-la-investigacion-con-74-millones

Gipuzkoako Foru Aldundiak 1.750.000 euro inbertituko du Arama, Berastegi eta Itsasondoko udaletxeak berritzeko proiektuak gauzatzeko, Landagipuzkoa 32 proiektuan aurreikusten den legez.

Landagipuzkoa 32 programa, Aldundia landa ingurunearen garapena bultzatzeko egiten ari den apustu estrategikoaren erakusgarri argia da. 2007 - 2011 aldirako gestio planean sartuta, programa honek foru departamentu guztien onarpena du eta hainbat departamenturi dagokion jarduketak hartzen ditu kontuan, hala nola bideak hobetzea, ur hartuneak, hainbat azpiegitura egikaritzea (hezkuntzakoak, sozialak, osasun arlokoak, kulturalak, kirolari lotutakoak...), berrikuntza, enplegua, prestakuntza etab. Inbertsio horiek lehentasunezkotzat jo dituzte kasuan kasuko udalek, nahiz eta udal horientzat zaila izan azpiegitura horiek egikaritzea, gestioaren tamaina eta konplexutasuna direla eta.  

Gipuzkoako Foru Aldundiaren eta udalen arteko kolaborazioa arlo ekonomiko hutsaz harago doa, laguntza teknikoa, juridikoa eta administratiboa ere tartean daude eta. Ildo horretan, Etorlur - Gipuzkoako Lurra, SAUri, udal onuradun bakoitzari zegozkion inbertsio planak lantzeko eta planotan jasotako inbertsioak egikaritzeko ardura eman zitzaion.

Informazio gehiago eskuratzeko:

http://www4.gipuzkoa.net/corporac/gnet/actNoticia.asp?c=422&p=comunIndex&i=c

http://www.etorlur.net/index.php?option=com_content&view=article&id=4&Itemid=7&lang=es

Mendebaldea zentraltasuna galtzen ari da, gero eta gehiago, eta hori argi geratu da Asiako Garapen Bankuak 2011ko maiatzean argitaratutako Asia 2050 txostenean. Txostenean, kontinenteak epe luzera garatzeko duen potentzialaren gaineko ikuspegia ematen da, hazkundearen motor deitzen zaien horietako bakoitzak egiten duen ohiko epe ertainerako ikuspegia eman ordez. Joera berrienak estrapolatuz gero, batzuek Asiaren mendearen berrezarpena izendatu dutena iragartzera eraman gaitzake, kontinente hori, egungo munduko Barne Produktu Gordinaren %27 izatetik, %51 izatera pasatuko litzateke-eta 2050ean. Asiaren per capita errenta seikoiztu egin liteke, Europaren egungo batez bestekora iristeko. 7 herrialde dira hazkundea bultzatzen dutenak: Txina, India, Indonesia, Japonia, Korea, Malasia eta Thailandia.

Baina txostenak agerian uzten du hazkundearen bide hori ez dagoela bermaturik eta Asiar mendearen agertokiaren aurrean, txostenak ordezko bat planteatzen du, non herrialdeak errentaren batez besteko mailaren tranpan erortzen diren: lehiakor izateari uzten diote beren faktoreen kostuagatik eta ez dira lehiakor izatera iristen produktibitatean.  

Bestalde, ezegonkortasun arrisku handiak daude, batetik, desberdintasun sozialek bere horretan jarraitzen dutelako -bai herrialde bakoitzaren barruan bai herrialdeen artean-, eta bestetik, erakundeek eta gobernantzak okerrera egin dezaketelako.  Bestalde, datozen 40 urteetako historiaren eta aurreko 40 urteko historiaren artean alde handiak egongo dira aspektu garrantzitsuetan, esaterako, gero eta urriagoak izango diren baliabideak lortzeko lehian (energia, ura, lur emankorra), klima aldaketak kostaldeko inguruetan izango dituen ondorioetan edo hiri aglomerazio handietan. Ondorioz, beharrezkoa da, batetik, nazio garapenerako, eta bestetik, eskualde lankidetzarako agenda konplexuei heltzea.

ASIA: Realizing the Asian Century

Kontseilu (gobernu) federaleko plangintza eta estrategia Kabinetea zazpi Departamendu Federaletako bakoitzeko ordezkari batek edo bik osatzen dute eta lau urtean behin politika federalaren gai nagusien gaineko baterako txosten bat lantzen du. 2011-2015 legealdiko programari dagokion egungo txostenak zehazten ditu, batetik, agertoki alternatiboak, eta bestetik, politika federalak modu koherente eta aktiboan aurre egin beharreko hamabi erronka estrategikoak.  Txostena irakurrita, ohartzen gara hainbat planteamendu bat datozela Gipuzkoa + 20 Estrategiakoekin, erronken artean hauek jasotzen baitira: (i) Herri Administrazioaren jarduteko ahalmena hobetzea, bere jardueren bideragarritasun finantzarioa, azpiegituren mantentzea eta osasun sistemaren gastuak egonkortasuna -kalitaterik galdu gabe- ziurtatuz; (ii) suitzar gune ekonomikoaren lehiakortasuna eta erakarpen ahalmena sendotzea; (iii) tentsio sozial eta kulturalak garaiz desaktibatzea, balio komunei atxikitzea indartuz; (iv) bilakaera demografikoari aurrea hartzea, immigrazio eta gizarteratze politika proaktibo bat martxan jarriz; (v) klima aldaketaren ondorioak mugatzea, baliabideak zainduz eta hornikuntza energetikoa bermatuz; (vi) informazioaren eta komunikazioaren teknologien potentziala aprobetxatzea, azpiegituren ahultasunak murriztuz; (vii) metropolizazioaren abantailak aprobetxatzea, urbanizatzeari lotutako arriskuak ahalik eta gehien murriztuz; (viii) Suitzak nazioartean duen rola eta bere jarduteko marjina indartzea; (ix) eta arrisku berriez jabetzea, barne eta kanpo segurtasuna bermatuz.

Erronka horiei eman beharreko erantzuna hainbat agertokitan aztertzen da, non mundu eta eskualde mailan integrazio edo zatiketa handiagoko hipotesi alternatiboak aurreikusten diren.

Perspectives 2025. Analyse de la situation et du contexte pour la politique fédérale.

Frantziako Analisi Estrategikoko Zentroak eta Ogasuneko Zuzendaritza Orokorrak batera egindako txostenak Frantziako ekonomiak 2030era begira dituen arriskuak eta aukerak aztertzen ditu. Nahiz eta krisiak Frantzian Europako gainerako herrialdeetan baino eragin txikiagoa izan, Frantziaren Barne Produktu Gordina %2,9 erori zen 2009an (Euro gunean, berriz, 4,1 erori zen batez beste). Txostenak etorkizunerako aukerak aztertzen ditu, eta horretarako funtsezko hazkunde faktoreetan, esaterako, biztanleria aktiboan eta produktibitatearen hobekuntzan, oinarritzen da.

Nahiz eta Frantziak halako neke bat jasaten duen produktibitate globalaren hazkunderako faktoreetan, badauzka baliabideak (goi mailako unibertsitate prestakuntza, azpiegitura bikainak, atzerriko zuzeneko inbertsioa...) dauden aukera sektorialak aprobetxatzeko, produktibitatean irabazteko eta produkzio sistema berrorientatzeko (osasunari, hezkuntzari eta klima aldaketaren kontrako borrokari lotutako IKTen garapena, zahartzeari lotutako sektore eta jarduera berriak eta gorantz datorren hirugarren sektorea, ekoberrikuntza etab.).

Gure artean gertatzen denaz bestela, Frantziak egitura demografiko dinamikoa dauka: 2010 eta 2030 bitartean 500.000 aktibo osagarri txertatuko dira. Gaur egun langabezia maila handia denez, erronkak lan munduan arrakastaz txertatzeari buruzkoak dira. Giltzarria da, beraz, politika orekatuak diseinatzea behar diren aurrekontu doiketak egin ahal izateko, inbertsioari norabide egokian eutsiz krisitik irteteko; horretarako, politika ekonomikoek koordinaturik egon behar dute, ez bakarrik euro gunean, baita ekonomia handietan ere -hala garatuetan nola goraka datozenetan-.

Egoera horretan, txostenak hazkunderako hiru agertoki posible jasotzen du:

-          Agertoki ezkor bat, deflazio orokorraren testuinguruan.

-          Joerazko agertoki bat, egungo suspertze biguneko joeren luzapenari lotua.

-          Ezin eutsizko hazkunde bati loturiko agertoki bat, non hazkunde-aldi aski dinamiko baten ostean berriz galerak etorriko diren, krisia eragin duten desorekak partzialki konpondu bai, baina ingurumenaren dimentsioa kontuan hartu gabe.

-          Hazkunde eutsi eta iraunkor bati lotutako agertoki bat, produkzio sistema berrorientatzeari elkartutako abantailak sortuko dituena, ingurumena errespetatuz.

-          Hazkunde eutsi eta iraunkor bati lotutako agertoki bat, enplegu politika boluntarista batetik eratorritako abantaila gehigarriak sortuko dituen lan merkatu eraginkorrago batekin.

2010-2030 aldirako agertoki horiei lotutako hazkunde tasak, bada, agertoki ezkorrari dagokion %1,6 eta azken agertoki optimoari dagokion %2,3 bitartean dabiltza; horrek esan nahi du 760.000 eta 1.900.000 enplegu bitartean sortuko litzatekeela aldi horretan.

France 2030 : cinq scénarios de croissance

Baliabideak eraginkorki erabiliko dituen Europa (COM (2011)21): horixe da Europa 2020 Estrategia osatzen duten 7 ekimen enblematikoetako bat. Helburua hazkunde iraunkorra sustatzea da, hazkundea eta materialen kontsumoa bereiziz eta energia berriztagarriak, garraio modernoa eta eraginkortasun energetikoa bultzatuz. Ekoberrikuntza Behatokiak bere lehen urteko txostena argitaratu berri du Europar Batasuneko herrialdeen egoerari buruz.

Behatokia 3 urterako ekimen bat da eta Europako Batzordeko Ingurumenerako Zuzendaritza Nagusiak finantzatzen du Berrikuntzarako eta Lehiakortasunerako Esparru Programaren funtsen bidez. Informazio sistema integratu bat garatzen ari da eta joerei buruzko analisiak egiten ditu, enpresei, zerbitzu hornitzaileei, politika egileei, ikertzaileei eta analisigileei zuzenduta. Europako bi ekimen handi hauei ematen die informazioa: Ingurumen Teknologietarako Ekintza Planari eta Europa INNOVA-ri.

Txostena baliabide materialetan zentratzen da; horien artean, jatorri fosila duten erregaiak, mineralak, metalak eta biomasa, ageriko arrazoiak tarteko: lehenik, klima aldaketan duten eragina. Bigarrenik, inportazioen mende egoteak dakarren ahuleziagatik. Eta azkenik, kostuak murriztuz lehiakortasuna hobetzeko dauden aukerengatik.

Txostenaren arabera, ekoberrikuntza aurrera egiten ari da herrialde guztietan eta praktika berritzaileak ari dira abiarazten sektore eta merkatu asko eta askotan. Baina aurrerapena nahi baino mantsoago doa. Hori dela-eta, txostenak informazioa ematen du joerei eta jarduera onei buruz, ezarri beharreko motor eta hesiei buruz eta sustapenerako ikuspegi eraginkorrenei buruz.

Landutako ekoberrikuntzako aurkibidearen arabera, Espainia europar batez bestekotik %5 gorago dago, tarteko edo erditik gorako lan taldean kokatuta, landutako jardueretan izandako zifra onei esker; horien artean: ziurtagiri berdeak, ekoetiketak eta ingurumen ikerkuntzarako baliabide publikoak. Nabarmendu egiten da uraren gestioan, eraikuntza iraunkorrean eta biogaseko industrian, eta eskaera elektrikoa kontrolatzeko teknologia berriak, nanoteknologia eta auto elektrikoa asko garatzea espero da. Konparazio gisa, Austria da herrialde aurreratuenetako bat, ez bakarrik jardueretan; baita emaitza adierazleetan ere.

The Eco-Innovation Challenge:Pathways to a resource efficient Europe

Europar Batasunak Europa Estrategia 2020 delakoa plazaratu zuen 2010ean, helburu hauekin: Europako susperraldi ekonomikoa orientatzea eta ekonomia, iraunkor, integratzaile eta lehiakorrago bat lortzea. Egungo «larrialdi egoeraren» aurrean, «Berrikuntzarako Batasuna Ekimen Enblematikoak» rol zentrala jokatzen du estrategia horretan. Helburua da aurre egitea, batetik, lehiakortasun erronka bati (Europako berrikuntza defizita gainditzea), eta bestetik, erronka kultural bati (gure gizartearen arazoak konpontzeko, ikerketa eta berrikuntza integratuz). Horrek aldaketa estrukturala ekarri behar du, ezagutzetan intentsiboagoak izango diren jarduera ekonomikoak lortzeko bidean.

Aurrerapenak neurtzeko, Batzordeak 3 tresna hauek dauzka:

-        Helburuen adierazle bat (I+G+b-ra zuzendutako Barne Produktu Gordinaren %3ko helburua, Europa 2020 Estrategiak markatzen duena), eta horren osagarria: egun prestatzen ari den adierazle sintetiko bat.

-        Emaitzen adierazle bat (Innovation Union Scoreboard edo IUS), Europar Batasunaren egoera eta 25 Estatu kideen egoera konparatzen duena I+G-ko 25 oinarrizko adierazletan.

-        Bi urtean behingo txosten estrategiko analitiko bat, lortutako emaitzen gutxiegitasunaren arrazoiak aztertzeko.

Lehen txosten horrek nabarmentzen dituen ondorio nagusien artean, hauxe azpimarratzen da:

-        Europar Batasuna I+G-ko inbertsioan %3ra iristeko helburura gerturatzen ari da poliki-poliki, baina Europar Batasunaren eta munduko lehiakideen arteko aldea gero eta handiagoa da, bereziki enpresek gutxiago inbertitzen dutelako I+G-n, krisia dela-eta (hala ere, hori konpentsatzeko, Europako herrialde asko I+G-aren finantzaketa publikoa mantentzen edo handitzen ari dira).

-        Europak badauka giza baliabide kualifikatuen multzo handi eta dibertsifikatu bat, batez ere zientzia eta teknologia arloan, eta enpresek ez dute hori guztiz aprobetxatzen. Berrikuntzarako Batasunak arrakasta izan dezan, funtsezkoa da Estatu kideek beren goi mailako irakaskuntza sistemak erreformatzea, lanerako prest dauden ikertzaile eta ingeniarien kopurua funtsezko eran handitze aldera eta, aldi berean, kualifikazioen eta enpresen beharrak hobeto egokitzeko eta mundu osoko talentudun handientzako ikertzaile ikasketak erakargarriagoak izateko.  

-        Europak potentzial handia du oinarri teknologikoko asmakuntzak egin eta asmakari horiek gure gizartearen erronka handiei eta munduko hazkunde alor berriei aplikatzeko; gauzatu ondoren, gainera, merkatura arrakastaz eraman litezke. Hala ere, enpresen I+G-rako behar bezain aldekoak ez diren esparru baldintzak eta Europako berrikuntzaren merkatu zatituak oztopatzen ari dira I+G-ko inbertsio pribatuak, eta horrek eragina dauka Europaren erakargarritasunean.

-        Eta ezagutzaren produkzioan nahiz zientzia bikaintasunean aurrean egon arren, Europa galtzen ari da emaitzen ustiapenean: Europan, ezagutzen transferentzia ez da oraindik nahikotasunera iristen.

-        Europako enpresa txiki eta ertainak berritzaileak dira baina ez dira nahikoa handitzen ari. Azken 35 urteotan, Estatu Batuek erakutsi dute askoz ere gaitasun handiagoa daukatela ikerketa sektore intentsiboetan enpresa berriak sortu eta enpreson kopurua handitzeko.

Innovation Union Competitiveness Report 2011

Euskadiko Garapen Iraunkorrerako Estrategia lantzeko prozesua amaitu egin zen joan zen ekainaren 7an zirriborroa aurkeztu zenean. Aurreikusten da ekainaren azken astean onartuko dela behin betiko, behin lanketa egiteko sortutako batzordeekin kontrastatu ondoren. Batzorde horien artean dago Erakunde arteko Batzordea, non hiru Foru Aldundiak eta Eudel biltzen diren, Eusko Jaurlaritzarekin batera.

Lehen zirriborro horrek etorkizuneko Euskadiren ikuspegia jasotzen du eta hori lortzeko bultzatu beharko diren helburu estrategikoak eta jarduketa ildoak zehazten ditu.

Hona hemen zehaztutako zenbait helburu estrategiko: Euskadiko ekonomia berritzailea, lehiakorra, eko-eraginkorra eta irekia izatea; babes sozialeko sistemak indartzea; natur baliabideak eta biodibertsitatea zaintzea; jatorri fosila duten energiekiko mendetasun energetikoa minimizatzea eta milurtekoaren helburuak betetzeari laguntzea.

2020 Garapen Iraunkorrerako Estrategiak 2009ko ekainaren 5eko "Urdaibaiko Adierazpenean" du jatorria, non Lehendakariak Euskadirako garapen eredu berri bat sustatzeko asmo sendoa zuela adierazi baitzuen. EkoEuskadi, bere garapenean, bat etorri da Europa 2020 Estrategiarekin, hiru lurralde historikoetako iraunkortasun estrategiekin (2020-2030 aldirako Gipuzkoa Estrategia, 2011-2016 aldirako Bizkaia 21 Programa eta Arabako lurralderako 2011-2015 aldirako Garapen Iraunkorrerako Plan Estrategikoa), baita Toki Agenda 21-en bidez euskal udalerrien lidergopean dauden iraunkortasun programekin ere.

Estrategia landu bitartean, herritar guztiei eta hainbat eragileri irekitako parte hartze prozesu bat antolatu da. Guztira, unibertsitateko 400 ikasle baino gehiagok, Lanbide Heziketako 850ek, ikastetxeetako 460k eta ia 1.700 erakunde, gizarte eta enpresa eragilek eskaini dizkiote beren hausnarketak EkoEuskadi 2020-ri.

Estrategiaren zirriborroa www.ecoeuskadi2020.net web orrian kontsulta daiteke, baita Estrategia hori gauzatzeko prozesu parte hartzaileetan egindako hausnarketen ondoriozko txosten ugari ere.

Arabako eta Bizkaiko Foru Aldundiek beren garapen iraunkorrerako estrategiak onartu dituzte berriki. Estrategiok Aalborgeko konpromisoen inguruan mamitu dituzte, aldundiok konpromiso horiek sinatu dituztenen artean daude eta. Konpromiso bakoitzerako, epe ertainerako ildo estrategikoak zehaztuta daude (2015 eta 2016 hurrenez hurren) Foru Departamentuetako eskumenen arabera eta udal administrazioetara bideratuta (Araban, 31; Bizkaian, 34). Ildo bakoitza Programatan eta Jarduketatan (75 eta 215 hurrenez hurren, Arabaren kasuan) edo Helburutan eta Jarduketatan (93 eta 334, Bizkaiaren kasuan) banatzen da. Beraz, desberdinak dira Gipuzkoako Estrategiaren aldean, zeren eta Gipuzkoako Estrategia lurralderako nahi den garapen ereduari buruzko hausnarketa batetik abiatzen baita eta paralelismo estua baitu Eusko Jaurlaritzaren Garapen Iraunkorrerako Estrategiarekin, kasu biotan denbora horizontea luzeagoa baita (2030 Gipuzkoan eta 2020 Euskadin).  

-        Arabako Foru Aldundia, Arabako Lurralde Historikoaren Garapen Iraunkorrerako 2011-2015 aldirako I. Plan Estrategikoa , maiatzaren 17ko Diputatuen Kontseiluak 298/2011 erabakiaren bidez onartua.

-        Bizkaiko Foru Aldundia, Programa Bizkaia 21 Egitasmoa 2011-2016, 2011

Milenio Proiektuak bi urteko azterketa bati ekin zion 2009an Latinoamerikaren etorkizunari buruz. Hori guztia bat dator eskualdeak independentzia lortu zueneko berrehungarren urteurreneko ospakizunekin. Azterketaren lehen fasea 2009 - 2010 ekitaldietan Real-Time Delphi (RTD) metodologiaren bidez inkesta bat egitea izan zen; ondoren bigarren RTD (Delphi denbora errealean) azterketa egin zen eta lehenengoaren emaitzak Latinoamerikako 2030erako agertoki gisa integratzeko diseinatu zen.

Real-Time Delphi azterketaren emaitzak atera eta berrikusi ondoren, Milenio Proiektuaren nodo latinoamerikarrek 2030eko Latinoamerikarako lau agertoki sortzea erabaki zuten, eta horretarako ardatz tekno-ekonomiko (bertikala) eta ardatz sozio-politiko (horizontala) bana erabili zuten. Ardatz estandar horiek erabiltzeak hobeto bistara daitekeen agertokien matrize bat diseinatzea ahalbidetzen du; lehenik, agertoki horiek proiekzio puntual batek baino askoz ere aukera desberdin gehiagoko gogoetak egitea ahalbidetzen dutelako. Gainera, agertokiak definitzeak posible izan daitekeenaren -nahiz eta oso gertaerraza izan ez- ikuspegia zabaltzen duten faktore gehigarriak identifikatzen laguntzen du. Azkenik, zenbait agertokik ezusteko gertakizunak (edo aurreko Real-Time Delphi-n identifikatutako "ustekabeak") isla litzakete, eta gertakizun horiek eragin eta ondorio garrantzitsuak ekar litzakete.

1. agertokia - "Bihar" gaur da: Arrakasta latinoamerikarra

2. agertokia - itxurei eutsiz: Onura mistoak

3. agertokia - Eskualdea garretan: Amesgaizto latinoamerikarra

4. agertokia - Sarea: Heriotza eta berpizkundea

Agertoki bakoitza Real-Time Delphi-an bildutako informaziotik eta Milenio Proiektuaren nodoek jasotako zuzeneko oharretatik abiatuta hasten da.

Informazio gehiago eskuratzeko:

www.proyectomilenio.org

Uztailaren 8tik 10era, World Future 2011 Konferentzia izango da Kanadako Vancouverren eta bertan prospekzioan adituak diren mundu osoko 1.000 lagunek parte hartuko dute.

Konferentzia aurreko ikastaroak uztailaren 7 eta 8an egitea aurreikusten da; kide profesionalen Foruma, berriz, uztailaren 11n izango da.

Aztertuko diren gaiak hauek izango dira, besteak beste: teknologia, hezkuntza, osasuna, negozioak, globalizazioa, aldaketa soziala, prospekzio metodologiak...

Ekitaldi honen gaineko informazio gehiago kontsultatzeko, sartu lotura honetan:

http://www.wfs.org/content/register-worldfuture-2011

Datorren irailaren 28an, Berrikuntza eta Prospekzio Teknologikoari buruzko diziplina anitzeko programa egingo da Argentinan. Programa hori garapenari eta lehiakortasunari datxezkion erabaki estrategikoak hartzeko desafioari aurre egiten diotenei zuzendua dago, kontuan izanik desafio hori gero eta konplexuagoak eta ziurtasun urrikoagoak diren ingurune sozio-ekonomikoetan gertatzen dela, zientziaren, teknologiaren eta berrikuntzaren aurrerapenen abiada azkarraren eraginez.

Exekutiboei, zuzendariei, eta gerenteei zuzenduta dago, hots, Negozioen Unitate Estrategikoetakoei, Negozio Berrien Garapen Unitateetakoei, I+G-ko Departamentuetakoei, Produktuen Garapenean dihardutenei, Transferentzia edota Lotura Teknologikoko Bulegoetakoei, Proiektuak Ebaluatzeko Departamentuetakoei, Plangintza eta Estrategia Departamentuetakoei; eta baita enpresaburu, ikertzaile eta aholkulariei ere.  

Programak azterketa ildo nagusien teoria eta praktika uztartzen ditu eta etorkizuna egituratzen du berrikuntza eta teknologia estrategia arrakastatsuak diseinatu eta inplementatzeko behar diren ezagutzak eta trebetasunak hartzeko.

Hauek dira programaren helburuak: erabakiak hartzearen eta zientzia, teknologia eta berrikuntza bilakatzeko dinamikaren oinarrian diren printzipioak eta inplikazioak ulertzeko behar diren ezagutzak hartzea, zuzendaritza estrategikoan garrantzizkoak diren gainerako dimentsio sozio-kulturalei dagokienez. Programaren beste helburu bat, berriz, hauxe da: etorkizuna aztertu eta eraikitzeko potentzialtasunak eta mugak, elementuak, metodologiak, prozesuak eta tresna giltzarriak ezagutzea.

Programari buruzko informazio gehiago jasotzeko, bisitatu link hau:

http://web.austral.edu.ar/ingenieria-posgrado-programa-innovacion.asp

World Future Energy Summit munduan den konferentziarik nahiz erakusketarik handiena da energia berriztagarriei eta etorkizuneko soluzioei, berrikuntzei, politikari eta ikuspegiari buruz.

Energia berriztagarrien industriaren barruan eragin handiena duten aktoreen bilkurarik handiena izango da eta etorkizunerako soluzio energetikoak eta inbertsio aukerak aurkeztuko dira.

Konferentzia Abu Dhabiko National Exhibition Centerren izango da 2012ko urtarrilaren 16 eta 19 bitartean.

Konferentziari buruzko informazio gehiago eskuratzeko, bisitatu link hau:

http://www.worldfutureenergysummit.com/

Ekainaren 25 eta 26an Foresight Nanotech Institute-ren 25. urteurreneko Konferentzia izango da Kaliforniako Sillicon Valleyn.

Konferentzia hori Google enpresak antolatzen du eta bertan nanoteknologiaren etorkizuna aztertuko da adituen eta enpresa espezializatuen ekarpenarekin. Hona hemen txostengileen arteko batzuk: James R. Von Her, Zuvexen (nanoteknologia molekularraren arloan arrakasta lortu zuen lehen konpainia) sortzaile eta lehendakaria eta Barney Pell, Mon Express, Inc (enpresa hori NASA-k hautatu zuen 10 milioi dolarreko ilargi zerbitzu bat emateko) enpresako lider teknologiko eta sortzaileetako bat.

Bilerari buruzko informazio gehiago eskuratzeko, bisitatu link hau:

http://www.foresight.org/reunion/index.html

2011ko maiatzaren 31n, Munduko Bankuaren txosten bat (Global Development Horizons 2011 - Multipolarity: The New Global Economy) argitaratuko da, baina horren edukietako batzuk dagoeneko agertu dira The New York Times egunkarian. Egunkari horren arabera, Txina, Brasil, Hego Korea, India, Indonesia eta Errusiaren hazkuntza izango da munduko hazkuntza ekonomikoaren erdia baino gehiago, eta gerta daiteke yuana, dolarra eta euroa erreserbako dibisa bihurgarri gisa bateratzea. Hazkuntza-ereduak bikoiztu egingo  dira gorabidean dauden herrialdeetan, eta, hala, finkatu egingo da potentzia tradizionalen garrantzia ekonomikoa murrizteko joera.

New Scientist aldizkariak dibulgazio-erreportaje bat argitaratu du, non etorkizun hurbileko aldaketa teknologiko handien ordezkari izango diren zazpi bektore teknologikoak hautatu dituzten. Komeni da teknologia horiekin ohitzea, litekeena baita laster gure bizitzetan gehiago izatea. Hauek dira horietako batzuk: telepresentzia, hiriguneetan errealitate areagotuko aplikazioak, 3Dn inprimatzea, ordainketarako diru-zorro digitalak eta neurozientziak eta horiek ordenagailuekin duten lotura.

Argibide gehiago lortzeko